Synopsis

المكان : الفيسبوك التونسي 

الزمن : بعد الإنتخابات  

الأبطال 

-منظر الثورة شخص يقال عنه مثقف في أغلب الحالات كان معروف بمعارضته لسياسة بن علي السيد هذا اليوم كيف الماء لا رائحة لا مطعم من أنصار الحوارات الوطنية قبل ما ياخذ موقف في قضية أو

يبدي رأي (مع العلم أن أي تشابه بين منظري الثورة و سمير ديلو أو حركة النهضة هي من محض الخيال وانّ أيّ تشابه في المواقف أو في الأفكار الواردة منهم هو من محض الصدفة )

-المدون الفاسبوكي شخص مهوش إفتراضي على غرار المدونين العاديين لأنه بعد ستاتي وجام  يمد كشخته في فيديو !! مدونته كيف أمن الدولة ما يعرفها حد  تستعمل نفس أساليب البوليس السياسي حسب تعريف سهام بن سدرين Marque Déposée يحترف التشهير السبان وقلة الحياء 

-السلفي البحبوح شخصية خيالية من أنصار الحرية.. السلفية ،شكله مخيف ورغم محاولته الإقتداء بالسلف الصالح فإنه من الناحية الجمالية يشبه أكثر للكفار متع فيلم الرسالة  

-الاولترا المتحزب فسبوكر يحترف السبام والكومنتيرات المنقولة أو الإبداعات في الإتهامات في كل ارجاء الفسبوك  

-السياسي والإعلام وهما دينامو الفريق بلاش بهم ما تنجمش تعمل حتى تشنشينة مش عمل مسرحي  

جينريك

ضيوف الشرف 

النقاب  

نسمة 

البلوطة متع الحداثي

السلفي Hello Kitty 

الخلافة   

الانتاج :مارك زوكربرغ

رغم عدم معرفتي بمقومات العمل الدرامي و على وقع الكراكوز اليومي  إلي نعيشو فيه فإنه الشيء إلي نراو فيه يستاهل عن جدارة إسم مسرحية

وانشاء الله بعد البث المباشر لمداولات المجلس بش نتعداو بمنتوجنا الدرامي إلى مستويات عالمية من نوع هوليوود 

إهداء

يا فرحتنا  بالتأسيسي

وبلي يحب يولي رئيسي

و باللبسة الجديدة للبولسي

يا فرحتي باللي بش يقريني ديني

باللي يتعارك على كرسي وناسيني

و إلي نهار نهارين بالثورة يهنيني

يا فرحتي بالمناضل ذو الرأي الوجيه

وإلي عارف العالم وما فيه

وبالحقوقي السفيه

إلي راس ماله "هذا بيه وهذا عليه"

والفرادي إلي المناصب تعميه

وبالشعبوية خرى فيه 

يا فرحتي بلي يسب في الدوعاجي

و باللي على حيطه في سقط الفاسبوك يبرتاجي

يا فرحتنا بإخواننا

ما يتشدوش كيف الخنانة

مشروعهم يبدا في الجبانة

و قضيتهم زنود عريانة

خايفين على سمعة نسانا

من غزرة ناسنا و جيراننا

يا مرحبا بالطرطور

 إلي بش يكتب الدستور

وإلي ربح كرسيه خاطرو عرعور

ومرحبا بالصحافي

 إلي قالولنا عليه وافي

وإلي طلعت جلدتو أصح من  القذافي

و يا مرحبا بسادس خلافة

وبالسياسة الجديدة الشفافة

وباللي يحب يورينا عرض اكتافه

يا سياسة في جرتك اش عانيت

وأنت لا قلقت ولا مليت

و قداش شلايك  لميت

بالصوت ولا بمباركة الهة الصندوق 

ديديكاس لكل فاسبوكر غفاص

 

في بلادي وين الرجل و المراة تتهان وين الشلاكة حاسبينو فنان. 

بلادي فين يفرعٍن القرصان و ولد فلان و ياكل العصا الفقري و العريان.

بلادي منخرطة في جامعة العربان و تحكي ياسر على حقوق الإنسان. 

و تكره برشة الظلم و العدوان وتضرب بالبونية على حقوق الحيوان

تي يمكن حتى مصححة في البيان متاع الحد من قنابل لاكريموجان

أما إذا كان تقول كلام ولا تصور أفلام متعجبش فلان ولا فلتان كون واثق إنو مصيرها النسيان ومصيرك السبان ...

كيما البلاد أولادها سكيزوفران.

ولد بلادي يتفرج فالرحمة إقرأ و الناس و يستعوذ من الوسواس الخناس 

أما يحب يكون أكبر بزناس و ميقلقوش يتكلم في بنات الناس 

و يحب يتصور في البوات و في يدو كاس أما هذا ميمنعش انو ياسر حساس 

ميحبش الكلام الزايد في التلفزة و الكياس أما كيف يبدا وحدو يتفنن في تذويق الناس 

بلادي وين تسكرت الببان و تلفزتها موجهة للحيوان وفين الناس تبهبر بالايمان 

و تلحس لفلان و فلتان على رخصة تاكسي ولا على قرض إسكان وين المفيد مكسي و المزمر عريان 

وليدها و يفهم في السنة وفي القرأن في التاريخ في الطب وكان لزم في جراحة الأسنان أما كيف تسألوا يضربوا النسيان ...

نظرية المؤامرة دليل المستخدم Théorie du complot mode d'emploi

الواحد هالأيامات شوية لا تقطعلو عرق من نظرية المؤامرة و الحق حسيت روحي متقلق كيفاش مانيش فاهم هالنظرية الهايلة وليت تمعنت في الموضوع وحمد الله يا ربي عندي حبيب يفهملها  في المؤامرات وهك الجو الليكس ولا عمل علي مزية وفسرلي العملية و بعد بعض التجارب الناجعة للنظرية  فهمت برشة حاجات والحق فيها إستعمال هين جداً للعقل "بحيث" (كيف ما يقول السبسي :)) ما تستحقش معرفة لا بالوضعية لا بالتاريخ لا بالجغرافيا لا بالسياسة لا بالإقتصاد !

testée et approuvée في تونس تخدم من بنزرت لبنقردان تلقاها عند المهندس وعند المخنان.

 من لاخر تتوفر فيها كل مواصفات الرخص والبنة.

إنت كيفي أنا ما تفهمش في نظرية المؤامرة تستنى كيف أمة محمد الكل بش تفهم إلي صاير تحب تعرف الناس إلي فاهمين الدنيا الكل كيفاش يعملوا  !!  
هاو بعض الامثلة  بش تولي تفهملها كما خواتك في الحقائق الخفية
P.S:la théorie du complot est open source tout est dispo sur internet 
.et gratuitement 

بن لادن مثلاً  عملتو أمريكا بش تنجم تخرج الروس من أفغانستان بالأمارة ما تحبش الاتحاد السوفياتي 

 سبتمبر11  عملتو أمريكا بش تشوه الإسلام بش تنجم تدخل لافغانستان بالأمارة تكره المسلمين 

الشاه عملتو أمريكا بالأمارة تكره المسلمين 

مبارك عملتو أمريكا بالأمارة ما تحبش العرب 

الحرب على الإرهاب عملتها أمريكا بش تنجم تدخل للعراق بالأمارة تحب البترول 

صدام عملتو أمريكا بش يقاوم إيران بالأمارة ما تحبش المسلمين 

الأزمة المالية عملتها أمريكا خاطر بلدان الخليج بداو يحسنو في الإستثمار متاعهم بالأمارة تكره العرب 

الدول العربية إلي عايشة تخلف على المستويات الكل جرة أمريكا  بسياسة تجهيل الشعب بالأمارةأمريكا تكره العرب 

القاعدة عاملتها أمريكا بش تخوف بها بالأمارة ما تحبش المسلمين  

بن لادن قتلوه الأمريكان ضاهرة الحكاية أمريكا عملتها بش تخوف بالإرهاب بالأمارة ما تحبش المسلمين بش هكاك  ينجمو يخوفو الناس من الإرهاب والناس تولي خايفة من القاعدة وتفك العرب من الثورات إلي هما ما يساعدوهاش  ما يساعدهاش والحق العرب يخوفو تي بالأمارة تكره العرب والمسلمين.

تو بما اننا متفاهمين على المستوى العالمي 

نتعداو للمستوى الإقليمي 

الإرهاب في الجزائر عملوه الجنرالات ولصقوه في جبهة الإنقاذ و الجماعة السلفية للدعوة والقتال.

تفجيرات الدار البيضاء عملوهم المخابرات.

 تفجيرات مراكش عملتها الحكومة المغربية بش ما تعملش إصلاحات 

 السادات قتلو مبارك ووحلها في الإسلاميين بالأمارة ما يحبش الإخوان المسلمين عفواً المسلمين .

حكاية سليانة الحكومة التونسية بش الناس تخاف ويرجعوا يقمعو .

ماء الفرق عملوا بن علي بالأمارة ما يحبش النهضة عفواً المسلمين .

سليمان عملها بن علي بالأمارة ما يحبش المسلمين.

رشيد عمار عمل مؤامرة بالأمارة جنرال وكان صدقني ربي عمل ستاج في أمريكا و يصنصر في الإنترنت 

الطريقة إذن ساهلة ياسر في متناول العقل العادي نتصور حتى بإستخدام صبع ساقك الكبير تنجم تخرج منها  مع اعتذاراتي للناس المؤمنة بنظرية المؤامرة مازلت مبتدئ يمكن !!

I الفاعل : اللعبة الكل هنا يلزمك تختار أي حاجة ما عندكش فيها ثقة مطلقة من المستحسن يكون الشخص هذا  عندو نفوذ و مهوش معروف معناها مخاطبك ما يعرفوش على خاطر في حالة يكون يعرفوا قد تتعرض لكبوت خايب برشة ووجهك يتزلع في القعدة وترصيلك تلون في وجهك وتطلب في السماح

 أمثلة: أمريكا بن علي مبارك رئيس المركز إلي في الدورة السبسي فرنسا طارق بن عمار نسمة.........

II المفعول به : الناس إلي ماعندهمش ثقة في الفاعل سواء كان شخص ولا منظمة شبح ولا دولة :p ولهنا إنت و مدى قابلية المخاطب للغة اليتم  ! 

الأمثلة : الشعب المتدينين المناطق الداخلية الإسلاميين المسلمين العرب 

III الفعل يتم إختيارو حسب الواقعة و يتم نسبه للفاعل إلي تم ذكرو [c.f I] وإلي التهمة كاملة  بش تتلفقلو: تفجيرات إرهاب حرب دكتاتورية قتل قمع .....

  

التبرير(Option) وهوني اللعبة الكل م تستحقش بش تعرف علم الاجتماع بش تفهم في الاقتصاد بش يكون عندك المام بالأمور السياسية كل م تستحقوا هو تهمة للفاعل إسلاموفوبيا هذي ليكس برشة  (fortement conseillée aux débutants ) يكره العرب يحب إسرائيل ماسوني صهيوني وهوني مذبك ما تكثرش في الحديث قد يهزك للكبوت إلي حكينا عليه في I

تقعد حاجة بش نقولها استعمالها مع عبد مهوش مغروم بها قد يتسببلو في نوبة قلبية ساعدو على العباد إلي تعرفوهم!!


 أيا انستو  

تكريز الديمقراطية

يلي تعرف قلي علاش علاش النظام الخامج ما يتداواش علاش عنا شلايك ما تحياش ؟ علاش قلقتهم الناس اللي تتظاهر في الكياس علاش اللجان المعنية ولغة الحرية وتكريس"ز" الديمقراطية علاش حكومة انتقالية إذا كان السياسة الأمنية هي هي و نفس وجوه القناة الوطنية و نفس أصحاب القرار والمسؤلية علاش عطاوكم الثقة جاوبتوهم بالحريقة عطاوكم الامان جاوبتوهم باللاكريموجان يا خراوات بين الأمان والسكات وبين قلة حياكم والحريات راهي الناس اختارت ووفات 

الدينو-كراسي

يلي تعرف قلي علاش ؟

علاش يلزمنا ديما نختارو بين فتح وحماس بين الرشوة و الفساد وأهل التكفير و الجهاد بين الشاه وأحمدي نجاد  ، ياخي مكتوب علينا نختارو بين الجنرالات والفيس "FIS" بين الصلاة والتكربيص بين الكشط والتلحيس بين الدكتاتورية والخلافة الاسلامية .

النوع الأول جربناه في بالي ولا إذا كان نحبو الدقة تجرب علينا و ما نتصورش انو يستهوى برشة ناس! بالنسبة للنوع الثاني إلي حسب رايي ضراب لغة من البريمة و يحب يجرب علينا حاجة تشبه أما مع إحترام مبادئ ديننا الحنيف معناها حويجة كيف كيف أما حلال فهمتلا .

  

إلي يقلقني في هالنوع الثاني أولاً هو إستعمالو للبكاء المفرط إلي ما يعجبنيش خاطر كثرة البكاء ما نراهاش حجة مقنعة في الخطاب السياسي .في أحسن حال إلي يبكي ينجم يكون حالو يسخف لا أكثر و لا أقل أما مهوش بشرطه هو إلي عندو الحق و النوع هذا الحق بكاي صحيح و بكاه ثلاثة أنواع 

البكاء الأول على المعاناة السابقة وهي حاجة ما عندوش فيها الحصرية حسب رايي ومهوش لازم ندخلو في التفاصيل 

البكاء الثاني على قوى الشر حاشى المحل إلي تكمبصلو ليل و نهار بش تحطملوا مستقبلو  على خاطر ما تحبوش و تكره البرنامج الدلول إلي ما عندوش وخاصةً تخدم أجندة ضد مرجعيته.

البكاء الثالث على الناس من ولاد بلادهم إلي تعدات عليهم المؤامرة إلي هوما يحبوهم برشة أما غير طايشين ما يعرفوش و هما مهمش فاهمين شبيهم ضدهم ديمة. 

تو بالنسبة للحاجة إلي تزيد تخليني نفقد الثقة في النوع هذا من الأحزاب هي التاريخ وكيف ما قال جمهور الترجي (جامي ننسى الحقيقة المرة.. )  

تو تبارك الله 100 سنة واش ملي بدات الأحزاب هذي تكور ولغة ما جاتناش الفرصة بش نوريو اش إنجموا نعملوا ماتوكلش!! أنا الحق إلي نتذكرهم بين النميري في السودان الفيس في الجزائر الإمام الخميني في إيران و السعودية بأل سعود ،لا نرى فيهم واحد يفرهد القلب و لا فيهم واحد رتح الناس من خلقتو باستحباب وهذوما أمثلة ضرت الإسلام أكثر ببرشة  من إلي ضرت الأحزاب و السياسة الحولة إلي دقدقو بها بلادهم.

 يقول القايل لا بالكشي إسلامهم ينجم يصلح دولة في حال يبداو "متدينين كيف ما يلزم" إي أما إذا كانهم متدينين برك هوما مؤهلين بش يصلحو نظام تعليمي متع كتاب لا أكثر. أنا نرى إلي الدولة تصلحها سياسة مش دين! والإقتصاد يلزموا قوانين وبرامج واضحة مهوش محصور في منع الربا مثلاً ولا في و التعليم حبتلو تحديث و شانتي أزرق مش أكثر سوايع تربية إسلامية ولا مدنية .....

 والبطالة يلزمهم برامج مش هوية! البطال ما يفقدش الذاكرة كيف تطول بطالته البطال يلوج على خدمة مش على هوية و أنا بحكم مرحلة البطالة اللاباس بها إلي تعدات علي نأكد إلي الحاجة الوحيدة إلي ما نجمتش ننساها في الوقت هذاك هي أني تونسي و دايور كان جيت سويدي راني ما قعدتش بطال الوقت هذاك الكل ههه

الحاجة الثالثة وإلي هي  تذكرني في السردوك إلي يتسردك وساقيه في الطبعة و هي نخبة الحزب إلي تتكلم على حداثة وديمقراطية و حريات وحقوق إنسان وقاعدة خطابها أبعد ما يكون على الأربعة هاذم أما يذكرك أكثر بجماعة التكفير والهجرة وحزب التحرير و حركات ما فماش شكون شوه الإسلام قدها هذيا إلي نرى فيه و بطبيعة الحال يبقى تقييم شخصي .  

هذيا بلا غير ماننسى إزدواجية الخطاب متع بعض الكوادر وحتى إزدواجية أفعالهم إلي سمعتوا مثلاً وريتو انو الكلهم ضد تسييس المنابر، وبعد يخرجلنا الدكتور يقوللنا نظفنا الجوامع وخلينا التجمعين الباهيين عاد صاحبي الغول علاش وجايع الراس وثورة وكرطوش وديقاج والواحد يبات كرشو تجري خايف لا من غدوة يقولولو لا راهي الثورة تلفولك عليها ،ولا ركبوا فوقها و قطعوا ؟،إذا كان بش تجينا سيادتك ربي يخليك تفرض علينا أئمتك علاش شكون كيفاش حسب أنا مقياس برى يفضلك برى يرحم والديك! ياخي نجيك أنا للدار نبدلك الشان إلي تتفرج فيها حتى كان هي من نوع تونس 7 ونقلك لا هذه شان ماهيش باهية أما أهوكا خليتلك الجزيرة باهية.

يا خويا في دارك جيبو يصلي بيك هالإمام الليكس !

في إنتظار برنامج وفي إنتظار انو الناس تنتخبكم خطاونا لا تبدلونا أئمة و لا تحلولنا بيران و لا تفسرولنا إسلامكم أما قولولنا اش بش تعملوا في السياسة !

الدين والدولة :التخليط مهوش باهي

من قبل برشة ناس تخرجلنا في التلفزة و تبدى تنضرلنا وتفهم فينا إلي الفصل بين بعض الأمور حاجة باهية من الفصل في أمور تخص السياسة حتى للحياة العائلية والحياة المهنية والأمثلة برشة كيف ما:

 

الفلوس والسياسيين الحاكم و المشرعين القضاة و المتهمين البوخا والدجين وكذلك الدولة والدين. هاذم الكل يتطبق عليهم مبدأ "التخليط مهوش باهي".

في الفلوس والسياسين هاذم باهي الواحد كيف يفرق بيناتهم بش ما يوليش السياسي ينظم في افرياتو ويستغل في حقو في التصويت في برلمان مثلاً بش تتنفنف أمورو.

الحاكم والمشرعين إذا كان إلي يحكم نعملولو قانون على قد قياسوا تولي خياطة مش تشريع وإذا كان المشرعين يستمدوا شرعيتهم من الحاكم ماهو تولي مزايا ومتسلفة ومردودة وبرا عاد فك يدي من شوشتك!    

الأمثلة برشة اخرين السلطة القضائية والسلطة التشريعية، الحزب الحاكم والدولة،الجيش والسياسة، الرخص و البنة الفقر و الفرعنة :p.

تو المشكل يبقى انو الناس "الكل" متفاهمين في الفصل بين الأمور هذي بش نبعدو على "شاشية هذا فوق راس لاخر"

وكيف تطالب بالفصل بيناتهم ما فما حتى أحد يجي يقولك:هذيا شي مهوش مقبول كيفاش تحبو تنحيوولنا الافاريات من البلاد ولا شنوا هذا باش تنحيو للسياسين فلوسهم ولا شبيكم تتحاملوا على القضاة وإلا تحبوا تنحيو السلطة التشريعية ولا يا دجينوفوب."Ginophobe"

بالنسبة للدين والدولة يضهرلي انو العاطفة تغلب العقل  و إذا كان داعيين عليك والديك بالشر غير برك تجبد على لسانك هاك الكلمة وتولي تسميع كلام وسبان  و توفى القعدة وإنت  إسلاموفوبي و تحب تجرد الشعب التونسي من هويته والناس إلي تتكلم كيفك تحركهم أصابع خارجية ويخدموا في أجندة لأعداء البلاد و الهوية العربية الإسلامية  (رغم إلي الكلنا عبينا منها شكاير هاللغة متع الأجندة و التمسح على اعتاب السفارات الأجنبية وهات من هاك اللاوي)

أولاً الفصل بين الدين والدولة ما يعنيش إنو المتدين معادش بش يمارس دينه ولا إنو بش نوليو نعملوا "Sapin" في نوال و "guirlandes" و جو ،وإلا إنو تونس باش تولي معادش دولة مسلمين (الملكة إليزابيت لليوم المعلمة جملة متع الكنيسة يا بو قلب مثلاً ) .ويضهرلي إلي المتدينين الموجودين عند أولاد العكري مهمش شوية وعايشين دينهم وما نتصورش مشاكلهم جاية من الفصل هذا بقدر ماهي جاية من محاولات توظيف الهوية في السياسة و الخطابات القومية الشعبوية.

لذا حسب رأيي العلمانية ما هي إلا ضمان باش الناس إلي تحب تعمل السياسة تسايسنا وما تبداش توظف في كلام مقدس للوصول لكرسي مذابينا يكون أبعد ما فما على القداسة!

لذا هي تخليهم يعطيونا رأيهم يقولولنا اش عندهم وآش ينجمو يزيدوا للبلاد موش اش ينجمو يزيدونا في ديننا!

حاجة أخرى تخلي بعض من الناس المتدينة تدافع على هالفصل هي تنوع الخطاب الديني معناها مش المسلمين الكل يخمموا بنفس الطريقة و"يمارسوا" دينهم كيف كيف ! لذا قبول توظيف الدين في الدولة حسب قراءة معينة يعني بالضرورة قبول كل أنواع القراءات و برا فضها وقتها.

كيف كيف الإنسان إلي يحكي في السياسة من منطلق قناعات دينية ما نراش في إطار للحوار معه على قرائته للدين لأنو الإيمان ما نتصورش انو حاجة "négociable" ولا فيها بيع و شراء لذا هو بش يعطينا رؤيتو و يوفى لحديث غادي و جرب ناقشوا في حاجة مبني عليها ايمانو "تي فمك يتدقدق" !.

النقطة الثالثة هي تطبيق  الديمقراطية في النموذجين إلي يفصل بين الدين والدولة وإلي يخلط بيناتهم اش ينجم يعطي.

بالنسبة للنموذج العلماني الشعب ينتخب شكون باش يحكموا والسيد ولا الجماعة هذم إلي تم انتخابهم ماعندهم توكيل كان من الشعب وما عندو كان الصلاحيات إلي موكلهم ليه الشعب

بالنسبة للنموذج إلي يخلط بين الدين والدولة الشعب ينتخب شكون باش يحكموا إلي هو بنفسه إلي باش يتكلم بإسم الله معناها السيد إلي تم إنتخابو توكيله مهوش واقف على الشعب وانما عندو صلاحيات باش يتكلم بإسم ربي ونوليو نرجعوا لنفس النموذج إلي فيه حاكم و محكوم و شرعية الأول مستمدة من الله و الرجال وقتها يعرضلو.

هذي رأيي في الموضوع ووراس لحنينة لاني نعمل في الفتنة !