mardi 18 décembre 2012

باش تحبوها بلاد



فاش تحبوه الإستثمار
في البونية والمشطة ومقاومة الكفار
في إرساء المنوال التنموي متع قندهار
وإلا في تهذيب ضرب البندير والطار 

باش تحبوه العلم بإلي عينتوه  وزير
و قلتوا قدام شهائده الكلنا حمير 
بلي قال بورقيبة يهودي وآل ثاني كبير   
بلي مقالاته العلمية مفقودة اللهم تنشرت في الضمير 


وبش تحبوها الثورة بلي فاق بالموساد 
و مؤامرات الفرنسيس وإسرائيل وقوم عاد
وقال لخرين تبقبيق و أنا الثورة ونعبي ستاد
وإذا به عبا شطر الاستراد 

وبش تحبوا الدستور بألي يقرا آيتين  يحل القيود 
ولعل كان قرى سورة راهو نحى العنصرية ضد السود 
فإدعيولو يقرا البقرة لعل ترتفع العمارات وتنشأ السدود 
و يحيي الأباء والجدود 

وبش تحبوا العدالة بإلي عطيتوه العدل وزارة
يشد في الناس تقول مضيفهم في داره
وجايب الجمعيات و إلي في الدين سمسارة
ولا إستعرف لا بقضاء ولا حقوق إنسان ولا زمارة


و باش تحبوا الإستراتيجيا
بصاحب الدراسات  و دولة القانون والمؤسسات
والديمقراطية و لغة النخب و الانبتات
و كان تكلمت ترصيلك يتيم الدكتاتوريات
و جريح الإنتخابات

بالله  باش تحبوها بلاد

jeudi 22 novembre 2012

إستراتيجية السطل بش يكون بطل !!



كان عندي صديق سنوات لتالي يجي معانا كيف نمشيو نلعبو Billard. كان الصديق هذا سطل بصفة غريبة في اللعبة هذه لم تنصفه لا الرؤية ، لا التكريز إلي كان يمكنه كيف يلعب،لا التركيز، لا قصر قامته اللي تخليه مشنقل فوق الطاولة وما تسمحلوشحتى باش يلعب البيس .
الحاصل شيء ما ماشي معاه العالم الكل ضده عاد كان سي وخينا كل ما نكملو الطرح يبقاله تقريباً الكور الكل إلي كان لازم يدخلهم بش يربح فوق الطاولة لكنه كان يقعد يكمل فيهم وحده كيف التبيب بعد يخلط علينا سيادته ،فرحان يدز في اكتافه ويقول جملته المعهودة كما كل مرة : "تييت أمها، مكمش بش تصدقوا أما دخلتهم الكل فرد ضربة !!" .
عاد ساعات نقول ثمة فئة في هالبلاد لعلها حتى الأغلبية حتى هي tellement تعيش الخسارة وراء الخسارة النكبة وراء النكبة  النكسة وراء النكسة  ولات تبحث عن قضايا ساهلة أو تنتظر متى توفى القضايا الرسمية بش تعلن انتصاراتها الوهمية في المعارك الحقيقية لكن بعد انتهائها.
بحيث كيف المرزوقي إلي تحدث على الفزاعات ونسب العنف السلفي للتجمع والبوليس السياسي و بعد ما شلك الدولة معه ولا يجيب في بعض السلفيين للقصر ويحب يوهمنا بأنه قام بإنهاء حرب أهلية أو واجه المشكلة  الأساسية ولقى الحل لهذه الظاهرة. مروراً بالناس إلي بحثت عن نصر وهمي حين ضرب إعصار  ساندي الولايات المتحدة الأمريكية وكبرت و هللت تقول الإعصار كان من صنيعة التكنولوجيا الحربية متع لجان حماية الثورة أو حركة حماس والمحامين إلي كانو يخدمو في الداخلية إلي يرفعو في القضايا ويدعون البطولة والطهارة ونظافة اليد كممثلين عن نوع من الضباط الأحرار mi-temps.
أخيراً النيابة العمومية إلي تتحرك حين سيبث حوار مع  سليم شيبوب (مع التأكيد أنه لم يبث بعد) ولم تتحرك  لا اثر تصريحات الغنوشي ولا اثر الإعتداء على المواطنين ولا حتى اثر حوادث القتل إلى ما صار ما صار !!
من الأخر الشيء كثر بصفة للي الواحد ولا حاسس روحو عايش في ملحمة إغريقية فيها أبطال وآلهة أو متحدثين بإسم الالهة على الأقل   
أشياء تخليني نتذكر صديقنا هذا وخاصة كيفاش كنا ننصحوه بش يبطل ال-Billard ويرجع يتدرب على البيس أحسن لأعصابه ولسمعته خاصة !!
بحيث النصيحة هذه الواحد اليوم يضهرلي ينجم يوجهها  للأبطال إلي بالبالة في هالبلاد.

وحديثنا قياس وأحسن تو كان نمشي نعمل كأس  .





mardi 23 octobre 2012

قصيدة وطنية في مدح الشرعية


في إطار الإحتفال بشرعية الإنتخابات و بما أني نتصور أنه النظام هذا نظام متاع إحتفالات وإحياء ذكرى وأنغام وطنية واناشيد دينية قلت نهدي شوية شعر رديء لعل تستثمروه في اغنية بأداء حتى محرزية العبيدي 



أيا بلاد الهناء 

و جودة الحياء
و الشلابق  من السماء
على رأس المعارض وفاء
لثورة الحرية فهم للوطن أعداء 

قل من أجلك يا إنتخابات
في قارورة من سائل يوضع في التواليت
سأضع اصبعي ولن اصوت للمرايات
ولا نداء ولا داعي الحريات
فالحمام سيد الكائنات

نعم لنا وطن
وننعم فيه بشبعة غنم
وفيه للبائسين الجلم
وفيه لمن يحلم العدم
وفيها  يمكن ما يسمى "علم"

فهنيئاً لنا بالديمقراطية
و شكراً لمن علمنا الهوية
ومرحى فحكومتنا شرعية
وشرعيتها ابدية
وشكراً على نعمة مقالات سمية

فهم بائسون يائسون
ويشربون الماغون ويتندرون بزيتون 
--------------------------------------
أما بش تخروولهم فيه و See you soon 

تنجموا تمارسو الفاحشة على السطر الأخير بما أنه منافي لأخلاقكم


jeudi 18 octobre 2012

شبيه الصحافيين ما تكلموش


بعد التساؤل الوجودي أو الخطير لقيادات الترويكا من سليم بن حميدان إلى علي العريض إلى لطفي زيتون 
وكيف فهمت انكم مغرومين بالأسئلة الإستنكارية و تعجبكم هيا قلت نهديلكم باقة من الاسئلة إلي تراود فيا عندها مدة 



شبيهم كانوا يقمعوا فيكم وقت بن علي 
واش يعمل طرشقانة فوق العريض علي 
وشبيه البوليس بدل الزي 
وشبيكم تسيرو في البلاد تقول لجنة حي 

شبيه الصحافيين قبل ما تكلموش 
وشبيه أمريكا شدها جورج بوش
وشبيه الشعب إلي صوتلكم كان ما على بالوش
وشبيه الفرخ كيف يكبر معادش يلبس الكوش

شبيك كنت مع مجلة الأحوال الشخصية 
وشبيك ما حكيتش على علومك الشرعية 
وشبيك كانت عاجبتك في "المنفى" العلمانية 
وشبيه كيف تجي عندنا تولي كخة الحرية

وشبيه وجهك كيف العتروس 
وشبيه المرزوقي ما كانش يلبس برنوس 
وشبيك سلمت على ماك كاين بالبوس
وشبيك تصرف و تبكي وتقول ما عنديش فلوس 

و شبيه الأرض مدورة 
وشبيه حكومتك في التزليط معورة
وشبيه ثمة ناس في الكياس متهورة
وشبيه وجوهكم تقول باليد مصورة
  
شبيه سوم العلوش يغلى حسب الإعلام 
وشبيه كيف وليتو تفرقوا في شهايد الإسلام 
 الناس ولات تتحسر على الازلام 
وشبيه كيف تحكو على عذابكم نحسو فيه نوع من الأفلام 

وشبيه هكاك عدنان منصر 
وشبيه احزابكم تعمل السياسة كان من منبر 
وينظاف من التجمع كل من هلل وبندر 
وشي لليوم النخبة ما حبتش تتحندر 







و-

mardi 16 octobre 2012

النهضة قراري والكوارث إختياري


و أنا نتفرج في تدخل أحمد المستيري اليوم في الحوار الوطني متع L'ugtt لاحظت إلي ما  قعد للنهضة كان أحمد بن صالح متع التعاضد أكبر كارثة وأتعس وزير معروف في تاريخ تونس كمساند  لها أو يمكن كذلك يصفي في مشاكله مع السبسي
بحيث شيء يخليك تتسائل كيف يمكن أن تكون هذه الحركة مغناطيس بهذا الشكل لكل الكوارث الموجودة على سطح الأرض 
أنا متأكد إلي النهضة كان جات جمعية راهي حرية وإنصاف 
وكان جات كرهبة راهي en panne 
كان جات تليفون راهو مقصوص  
كان جات انترنت راهي في الصين 
كان جات لغة رانا بكاكش 
كان جات كمبيوتر راهي داكتيلو 
كان جات مغنية راهي منال بن عمارة
كان جات ديانة راهي secte 
كان جات ثقافة راهي السلفية 
كان جات ايديولوجيا راهي الVégétarisme 
كان جات رئيس دولة راهي المنصف المرزوقي 
كان جات ياغرت راهي فاسدة    
كان جات قهوة راهي بالحليب
كان جات بيرة راهي sans alcool  
كان جات Jus راهو طماطم 
كان جات مخدرات راهي كسكروت بالسيراج 
كان جات mode راهي ال-Claquette 
كان جات rappeur راهي Dali Benj
كان جات مزاودي راهو مات من هاك العام مدغور في ربوخ 
كان جات dentiste راهو إنتحر 
كان جات راديو راهي الزيتونة 
وكان جات تلفزة راهي إقرأ 
و كان جات كوميك...بون صحيح هي "سي ديجا" كوميك 
وكان جات فيلم راهو هنداوي 
وكان جات راجل لا تي بالحرام لا تجيها راجل 

 من الأخر النهضة قراري والكوارث إختياري 

dimanche 14 octobre 2012

هما فين واحنا فين



فيليكس بوكوفسكي و ستيجليتز 
منال عمارة وجدي غنيم وغلفة فيكس

الجاذبية Monetarism النسبية
بول البعير السواك والطرنجية 

مانشستر الريال وبرشلونة
أوه يا مازمبي الكورة كيف في الحومة 

طلعو وهبطو من السماء
واحنا لبهامتكم ما لقينا دواء 

ما شفنا كان لجان حماية الثورة والبونية والمشطة 
الشعبوية القباحة والبوكشطة 

شفنا فيهم استثمارات فلوس الRedBull 
و لا لوجو نهار وين يلزم البعير تبول 

جابولك الفور سكوار التويتر و الفيسبوك  
ريناهم معكم صقور نهضة وحقائق في مخك ينيكوك 


الحبة السوداء و البوخوخو ومسلمين وفرحانين 
النوبل والفيلدز ولا دينيين ومهمش هوني واقفين 

الموزيكا والمسرح والفن 
خريتولنا في كيوفنا بالغبن وثقافة الكفن 

يا ناس يا متع الدين هو الساس 
وما خلتولهم كان الوسواس الخناس  

لعرفناكم من تونس ولا من الحجاز
تحكيو على إسلام تونس وتستشهدو بإبن باز  

يا متدين ويا إلي بالغنوشي متيم
وفي حكومة ريوس الفجل تحب تتعين

وجاي في السياسات تقيم 
وبتكرت الإصلاح بالتدين 

وفهمنا معك الأخلاق 
وبمؤامراتهم شيخكم فاق 

شوفولنا حتى بلاصة عند القفجاق
لعل نفهموهم ويفهمونا وكفانا نفاق 

mercredi 10 octobre 2012

يا مواطن دولتك مدنية


مدنية 
يا مواطن دولتك مدنية 
وفيها أولادك سلفية
وفيها الشريعة الإسلامية
وفيها الجوامع احزاب سياسية
وفيها التجمع علمانية

ديموقراط
يا حبيبي حزبك ديموقراط
وعلي العريض تكنوقراط
وفيه مناصب لفقهاء البلاط 
وفيه لأنصارك حق تضهيدنا بزلاط 
وفيه لنا حق الإستنقاط 

جمهوري 
يا ترويكا نظامك جمهوري 
وفيه مراياتك من عند الطرطوري 
وفيه عمى حزب البوري 
وفيه المجلس التأسيسي كوري 
وحقك يا نهضة على المجتمع المدني تغوري 

شرعي 
نظامك يا حكومة شرعي 
يا إلي في خواطرنا تدرعي
وفي الإصلاحات ردي بالك تسرعي
وفي التشقليب تبارك الله تنوعي   
وعلى الحريات ديمة تتجربعي 

ربيع 
يا سي عربي ربيع 
رد بالك تضيع 
تبع حكومتك إلي في الدين تبيع  
و حزبك ضد الردة سد منيع  
و ما يختارلك كان تجمعي ذوقه رفيع 




vendredi 5 octobre 2012

قناة المعدنوس في حوار مع خميس العتروس



مانيش عارف كيفاش باش نبدى الحق ...
اش باش نقلكم طحت وليت مدمن.الله غالب! حششت .كل نهار جمعة يلزمني دوزتي من غزوة سفارة نصرة رسول ،جهاد كلصوني...
أضعف الإيمان فيديو لأبو عياض يا رسول الله !!
الجمعة هذه قمت على الصباح شي صحراء ما ثمة شيء ...بديت نلوج وبطبيعة الحال  إلي يقصد يقصد دار كبيرة وشديت الرحال للصحافة المحايدة من زيتونة و سبيل وحرية أنصاف لعل ربي يخفف علي من هذا الإحساس الثقيل بالإدمان. 
يا سيدي ونطيح بفيديو(أهاوكا الرابط متاعها الفوق) يعمل الكيف للشيخ خميس الماجري على قناة المعدنوس وتقديم ولا أروع لشيخ يبدو أنه المسيح متع التيار السلفي في تونس 
يا سيدي سي خميس الماجري هذا نسخة ملتحية لعماد المهذبي أما اللحية حاصرها بفوشيكة.
عاد ما نطولش حطيت الفيديو وإتوكلت على الله .
أولاً أول ما بدا خموس يحكي لاحظت أنه ثمة حاجة تجمع بينه وبين برشة من القادة في هذا التيار.كيف تسمعه  تقول عليه ممثل جمعية حماية الفقمة في القطب الجنوبي : يحكي بهدوء تام وخشوع شيء كبير.
بعد كيف تشوف محتوى الحديث يولي كلام أخر ...
خموس يا سيدي و بهذا الهدوء الرهيب ركح فيها بالمشطة عاري ولابس في النهضة في أمريكا في فرنسا في الديمقراطية في التدين المزيف متع لخرين ( يمكن على خاطره الوحيد إلي عنده ال-Manuel متاع التدين الصحيح وبالأمارة مخبيه في هاكاللحية) !! 
ما سيب حد الكلها خايبة وما تسواش .بخلاف أربعة شيوخ الصغير فيهم نحييو اليوم الذكرى 200 لوفاته ..  
عاد كيف تشوف خطابه تتذكر نوعاً ما بن لادن وتلاحظ أن الخطاب الجهادي لم يتطور من عبد الله عزام مروراً ببن لادن وأبو حمزة المصري  إلى اليوم.. نفس اللغة "شي ما تبدل" (كما يقول حزب العمال الشيوعي).و إلي يخلي وقعه على بعض الناس و انتشاره يقوى أو يقعد بهالقوة هذه يرجع يمكن لأنه ما ثماش Alternative.
شيء والو... لا حياة لمن تنادي...في إستقطاب الشريحة المستهدفة عبر الخطاب هذا من طرف الأطياف الأخرى متع المجتمع. 
عاد كيف يبدا يحكي مع الشريحة المستهدفة هذه المتمثلة في الأقلية الشانعة يبدا يستعمل في كل ما تردده الحركات الثورية "اليسارية" من شعارات أما بغطاء "شرعي" ويزيد يركب على كل نظرية مؤامرة بعد ما يغطسها في الهوية الإسلامية ويزيد في الأخر يفوح ببعض التقنيات السينمائية كيف يبدا يحكيلك على الفرقة الناجية تقول يحكي على ال-Dernier Samourai ولو إنه خموس ما يشبهش برشة لتوم كروز ...
سي خميس الماجري يكره أمريكا وقال أنه باش يكره الصين يمكن نهار أخر . ويكره بريطانيا وانا متأكد كان في يوم من الأيام  بعيد الشر تونس تولي دولة عظمى تي بالحرام لما يكرهها..من الأخر : "هو كخميس الماجري ضد".
سي خميس كذلك ميدالية أوليمبية في الجمباز الفكري كيف يحكي على القرأن والسنة ويقول يلزم نخدموا بهم يخيل لك وإنت تسمع فيه أنه ثمة قراءة فقط ومذهب بارك و هو نفسه في بالي ينسى ال-72 فرقة إلي حكى عليهم 
خميس كذلك حقوقي فذ صحيح مش كيف المرزوقي أما حسب ما فهمت يكرز من حكم الإعدام فهذا معادي لحقوق الإنسان السلفي إلي هو الوحيد المخول باش يطبق الإعدام  
بحيث بركاتك يا ثورة البص فش رصاتلنا نعانيو 
وكل نهار جمعة واحنا فرحانين 
وحجة ميمونة لنواب النهضة إلي باش يجي نهار و يطلعوا مش مسلمين.



mercredi 3 octobre 2012

صورة تونس في عيون المومس

قتلي صورة تونس يا وجه المومس ؟ 

يا حبيبي يعدو فينا في ال-CNN 
إلي يقلك جماعة ربيع الجرذان 
إلي حل ربع شباك وطربق في وجوهنا شبعة بيبان 
ووقفنا في المقدس بين الشاعر والفنان 
وصكوك التقوى والإيمان 

و عداونا في فرانس 24
وخرجوا علينا فقهاء البلاط 
ممن إحترف الصياح والعياط
ألي ما يقلقهمش الاغتصاب بقدر إلي يقلقهم اللواط 
ببراهين وعبارات لا تقنع في المرء حتى السباط  

ردوا بالكم تعطيو في رواحكم النقص 
يمكن تتعداو قريب حتى على الفوكس 
يمكن في ريبورتاج حول خلط السياسة بالبوكس 
أما بطبيعة الحال المعارضة تنشر في الأنتوكس 
و حرياتكم ماهيش منفوخة بالبوتوكس 



أما لا تخشى شيئاً يا وجه الفطيرة
 تو يعديوك في الجزيرة 
وتفسر كيفاش هذا الكل جاي من الغيرة 
من كفائات الحكومة الكثيرة 
 وترصيلي أنا نشرب في الدوبل بيرة


وأحكيلهم على جرحى الإنتخابات 
وتطبيق القانون في المحاكمات 
و إلي عندنا عيب التجاهر بالحياة 
وإلي عهود الإستبداد ولات 
وعلى ايتام فرنسا والانبتات 

وايجا على القنوات المحلية
واعطينا دروس في الوطنية
وأحكيلنا على صاحب الشرعية
وعدي سبوت العدالة الإنتقالية
لعل تلقى بيعة لإقامتك في دهاليز الداخلية

وكيف تمشي للخارج تنومس 
وكيف ترجع أحكيلنا على صورة تونس يا وجه المومس



  




vendredi 14 septembre 2012

حكاية مؤتمر



في عهد الفلول ودكتاتورية البعلول كان هناك حزب إسمه مؤتمر وقد كان قليل النفر كثير الخور رئيسه كيف تشوفو يحكي تقول عامل سطر و من لم يعارض على طريقته كفر !!
دارت الأزمان وخيل لنا لبضعة أشهر أو أيام أننا أمام إعلان أن التونسي قد أصبح إنسان ثم جو الجرذان وكان ما كان وولى هذا الحزب الثاني في البرلمان و ذلك بعد أن أشهر بنديره لنصرة الإخوان
كان له الوزارة  و لكن الصلاحيات عند جاره و كانت له الرئاسة بدون الحق أن يتكلم أو يمارس السياسة 
فيما يلي تلخيص عن مؤسسي حزب الرئيس الذي إتخذ في الفكر كمنهج التكربيص :
كانت فيه أم زياد قررت أن ترحل بما أنه الإصلاح في هالحزب ما فاد !!
فيه صاحب الساعة الذهبية والخواتم الفضية و من أنصار الشعبوية لا محالة كيفه كيف البقية : عبد الوهاب معطر  كيف تشوفو تقول ماكرو كولومبي متنكر !!
و فيه سمير الباندا أوتار صوتية توصل لرواندا كائن عنيد ومنطق يعوج الحديد ليس كسائر النواب تسألوا على الهجرة يجاوبك على ضحايا قانون الإرهاب تسأله عن السياره فيجيبك بأنه لم يغادر داره رغم ما يخوله له منصب الإستشارة !!
  وفيه العيادي صاحب نظرية وراء كل حدث أيادي من عهد دكتاتوري سادي. 
و فيه الطرطور جزاء لكل من لا يقرأ بين السطور وظن أنه على مبادئه يوماً سيثور وعمل عليه في كتابة الدستور وإذا به يكتشف أنه عرعور واستحق عن جدارة لقب الديكطرطور. 
و فيه عبو زميم إصلاح الإدارة ذو صلاحيات جبارة لا تكاد تتجاوز صلاحيات شاوش في وزارة كان يجيد الخياطة ثم بان بالكاشف أنه من فقهاء البلاط(ة) فهدد باللاكريمجان بعد أن أراد ايهامنا بأنه يمتلك حصرياً دومان حقوق الإنسان ثم كان له أن لوح بالإعدام بعد أن استهلك ذاك الإتهام بأن كل من عارض هذا النظام ازلام !!


هذا هو المؤتمر : حزب من لم يسانده إما كفر وإما بهذه البلاد غدر  وكيف ما قتلوناش لليوم ربي ستر !!

lundi 21 mai 2012

إنه عهد الإرهابي البحبوح يا مولاي!!




بلدنا سيدي خويا جوها باهي تعمل الكيف بحبوحة شي كبير, بلاد على شاكلة لمين النهدي و نصر الدين بن مختار, ماركة ضحك ماركة جو  ...
تي شوف ناسها إنتي كابوسين الصباح وكعيبة كرواسان وجريدة ما جات شي( شروق صريح تفادياً للتخمام و إقتصاداً في الحريرات)  كويس تاي العشية مشموم  وشيشة جيراك في الليل 
بحيث في العالم ما ثمة حتى إنسان يخدم عندو نفس البرنامج اليومي مش على حاجة !! أما على خاطر التونسي بحبوح سبحان الله !
باهيشي أكثر من التطرف إي نعم عندنا التطرف البحبوح 
يقول القايل  ويحك يا مولى المدونة هالريق مش جونا  !!

يا سيدي لا !! باهي شوف إنت حكاية سجنان 
جريدة خرجت خبر إلي ثمة في قرية من قرى الإيالة ناس تحكم بأحكامها وألي يتكلم يمسدوله ضهره بيد بالة وناسنا على شنوا تحكي ؟ تحكي على الجريدة زبالة ذلك رغم تأكيد رابطة حقوق الإنسان للخبر   وكأنه المشكل مهوش في أنه ناس تحكم بقانونها في دولة ذات سيادة  وانما الجريدة وكيفاش تستعمل كلمة إمارة

نزيدك أكثرشي من أحداث الروحية جنود موتى وكرطوش يخيط وفرق مكافحة الإرهاب والطامة والعامة ...لكن هيهات المواطن الفهيم يعرف منين يبدا الحكاية يبداها بالمريول و الإرهابيين زوز ولا ثلاثة.. أي أي نعم  بالمريول  إلي لابسو السيد إلي متهم في الحكاية ويلوجو عليه !! ملا وينك بعد أخر تقنيات مكافحة  الإرهاب و الاستخبارات المواطن و كأنه جدت كيف قالولوا إنت تابع الشعب العظيم ألي قام بالثورة المباركة فأبدع وإبتكر تقنية الإستعلامات بالمريول كما لو أنه الموضوع الأساسي هو المريول !!  و الموتى كردونة و الإرهاب مش إرهاب و المؤامرة خدامة.

بلدنا المزيانة وبخلاف الغبرة و جوها المزيان من خاصياتها  كيف كيف أنه الدنيا الكل بالوجوه على دار على خدمة على كرهبة كل شي تي التطرف أصل بالوجوه 
كفاش بالوجوه 
ميسالش مثلاً كيف تمشي تحرق دار القروي ماهو جابها لروحو !! بون مع واحد أخر مش كيف. أما القروي ما دام بوه حنين بطريقةغير مباشرة تنجم تقول هو إلي تسبب في حرقان داره. كما لو أنه واحد عايش في السافانا بش يمشي ياخذ حقه بيده وكما لو أنه كيف تعدي فيلم من المفروض أنك تقرا حسابك ثماش شكون يكرز ويجي يحرقلك دارك   ...
الأمثلة الأخرى برشة كريشان نادية الفاني وبطبيعة الحال هذا عنف بحبوح بما أنه الناس هاذم جابوها لرواحهم  .. 
مع بعض الناس ثمة إستعمال لمقولة الليقة تجيب وهكا ديمة ارهابنا وتطرفنا  مزيان   
حمادي الرديسي نموذجاً وكيف ما قال عبد الرؤوف العيادي الحقوقي الفذ تي حتى هو يكتب في كتب معادية للإسلام معادية للإسلام أصل يا بو قلب 

من الأخر كل عام وتطرفنا مزيان وبلدنا أزين البلدان 


  

dimanche 20 mai 2012

شبيكم ؟




يا سلفية شبيكم تحكيو معنا بالعربية ؟نظهرو لابسين كيف جماعة الحجاز ؟  وجوهنا وجوه الجزيرة العربية؟ 

يا صحافي المجارى شبيه والديك خنست بعد خرجتلنا كالجربوع في الليل ساري 

يا متاع حقوق الإنسان شبيه التجمع مزيان كيف يبدا ليك إنت طحان

يا سيد  الرئيس شبيها الرئاسة ولات فيس وإبداع في فكر التكربيص 

حشمت و طلبت السماح من 100 عتروس ؟ وماحشمتش كيف مديت يدك للبوس ؟

شبيك عامل مائتين مستشار وهو في الأصل  كونسرفاتوار لضرب البندير والطار 

يا حكومة يا دمدومة يا متاع الكفائات والناس المظلومة 

شبيكم تحبو اش و-700 مليار وانتم الناس المؤمنين ونحنا ديمة الكفار 

وشورو مانديلا واحنا متاع الرذيلة ؟

شبيكم تحبوا تنحيو الشراب هانا نحنا قابلين بوجوه ال*حاب ؟

شبيكم حالفين تجمعوا بين اللحية والطحين بن السياسة والدين بين اليتم والتسكبين قصر الجلباب و صفورية السنين ؟  

نعن دين والديكم نعن دين والديكم نعن دين والديكم