خميس على جوكم يا جماعة المسؤوليات

حبو السكات والمسؤوليات والأيسونس بونووات والكراهب بالريدووات والكورتاجات وقعدوا في بلايصهم سنوات وسنوات
و كان خلاوهم راهم قعدوا مدى الحياة أما ما حبوش المساءلات
و التحقيقات في خفايا الأفاريات(les affaires)

وإلي يجتهد كاريارو وفات  شي كبير فالتصفيق في الاجتماعات

وتعديد الإنجازات وتمجيد العروفات وهات من هاك لحكايات 

و يا حوات على شعب كره السكات ونهض وسار في سبيل الحياة   !!

وهنا الكلام ماهوش عل "التكنوقراط"
 وعلى الناس إلي خدمت في السكات 
أما على نوع من الفئات احترفت المناشدات 
والبروباجندا للسياسات ودافعت على التجاوزات

توا رجعولنا بالإتهامات والمزايدات

وقالولنا إلي ماعندهم حتى يد في هاكالحكايات

وإلي هوما مسيكينات وما تكلموا كان تحت التهديدات

أضعف الإيمان انكم تستناو تخرج الدبابات
ويقضى على ما يعبر عنه ب"المليشيات" 

حسب إلي نرى فيه من فيسبوكيات
 فيما يخص إلي فات وتحديد المسؤليات 

نتصور اني مانيش وحدي إلي نرى  انو ماهوش وقت المحاكمات

و العدالة  ماتجيش في حومة بالزلاط ولا بالصياح والعياط وريق المؤامرات

أيا يزيني ما حكيت لعبت عليا الدوخة من الحريات 

Ecrire pour ne pas pourrir ...

 هيا سيدي مرحبا وعلى بركة الله فهمتني ولا لا باش نحل هالطبة أرض في انترنتنا الواسعة

يا خويا البيكسل (pixel) غلا  2011 بدا الصبر وفا والواحد ماذابيه ياخو بايو من تو ما دام مازالت البلوغات بلاش  !!

السيد إلي يكتب في ها البلوغ ضاربوا داء مش عارفوا منين جاء وملقالوش دواء ،قليبو تكوى 

و لا فاد فيه لا الشعير و لا "الهواء" و قعد يستنى في رحمة السماء عاد في ليلة من ليالي الشتاء

مخو تستوى و قرر يكتب في هالقطعة خلاء 

برا يبعد عليه البلاء و يدز عليه بالفلوس من السماء.

لتحقيق هذه الغاية النبيلة تم إسناد كل الصلوحيات (والمسؤليات دايور!! ماتعرفش على البلاء)

في إطار علاج رعواني تحت شعار (écrire pour ne pas pourrir)  لسي ميلس لازي يبعد عليه الكوازي

من المتطرف للنيو نازي و كل من تخمامو متاع واحد بلاصتو ماهيش هوني أما في الرازي.

ميلس لازي هذا ، عايش في بلاد ضربها الكساد

شرابها غداد !حسب ما سمع يكرهوها الحساد

يقولوا فيها الفساد لا تسمع فيها شكون ماهوش فاد ،

فرعن فيها القواد و شي معاه ما فاد ،مما سهل استفحال فيها آفة القراد 

 ميلس لازي هذا عندو إذاً الصلوحيات بش يكتب.

بش يكتب على إلي هب و دب

و شر ما كسب و الأمن إذا استتب و إلي دارو قصب

و إلي صب و إلي تسب وإلي ماعونو ذهب

وعلى إلي كان سبب وعلى قليل الأدب بش بلوغو يتحب 

 ويدخل فيه الإشهار و يعمل المليار

و يعملولوا قدر و كار ويدخل في حزب "الحبار"

ويتعدى في الأخبار و سعدو يتكب (tout obéit à un cycle)

 غير بركة يقعدلوا حق عصير العنب

و شوية دبابز جوني والكر تيكت ذهب

ألي خلاهم من أيامات إلي كسب

PS  نوعدكم آخر مرة بش نكتب بضمير الغائب