قناة المعدنوس في حوار مع خميس العتروس

مانيش عارف كيفاش باش نبدى الحق ...

اش باش نقلكم طحت وليت مدمن.الله غالب! حششت .كل نهار جمعة يلزمني دوزتي من غزوة سفارة نصرة رسول ،جهاد كلصوني...

أضعف الإيمان فيديو لأبو عياض يا رسول الله !!

الجمعة هذه قمت على الصباح شي صحراء ما ثمة شيء ...بديت نلوج وبطبيعة الحال  إلي يقصد يقصد دار كبيرة وشديت الرحال للصحافة المحايدة من زيتونة و سبيل وحرية أنصاف لعل ربي يخفف علي من هذا الإحساس الثقيل بالإدمان. 

يا سيدي ونطيح بفيديو(أهاوكا الرابط متاعها الفوق) يعمل الكيف للشيخ خميس الماجري على قناة المعدنوس وتقديم ولا أروع لشيخ يبدو أنه المسيح متع التيار السلفي في تونس 

يا سيدي سي خميس الماجري هذا نسخة ملتحية لعماد المهذبي أما اللحية حاصرها بفوشيكة.

عاد ما نطولش حطيت الفيديو وإتوكلت على الله .

أولاً أول ما بدا خموس يحكي لاحظت أنه ثمة حاجة تجمع بينه وبين برشة من القادة في هذا التيار.كيف تسمعه  تقول عليه ممثل جمعية حماية الفقمة في القطب الجنوبي : يحكي بهدوء تام وخشوع شيء كبير.

بعد كيف تشوف محتوى الحديث يولي كلام أخر ...

خموس يا سيدي و بهذا الهدوء الرهيب ركح فيها بالمشطة عاري ولابس في النهضة في أمريكا في فرنسا في الديمقراطية في التدين المزيف متع لخرين ( يمكن على خاطره الوحيد إلي عنده ال-Manuel متاع التدين الصحيح وبالأمارة مخبيه في هاكاللحية) !! 

ما سيب حد الكلها خايبة وما تسواش .بخلاف أربعة شيوخ الصغير فيهم نحييو اليوم الذكرى 200 لوفاته ..  

عاد كيف تشوف خطابه تتذكر نوعاً ما بن لادن وتلاحظ أن الخطاب الجهادي لم يتطور من عبد الله عزام مروراً ببن لادن وأبو حمزة المصري  إلى اليوم.. نفس اللغة "شي ما تبدل" (كما يقول حزب العمال الشيوعي).و إلي يخلي وقعه على بعض الناس و انتشاره يقوى أو يقعد بهالقوة هذه يرجع يمكن لأنه ما ثماش Alternative.

شيء والو... لا حياة لمن تنادي...في إستقطاب الشريحة المستهدفة عبر الخطاب هذا من طرف الأطياف الأخرى متع المجتمع. 

عاد كيف يبدا يحكي مع الشريحة المستهدفة هذه المتمثلة في الأقلية الشانعة يبدا يستعمل في كل ما تردده الحركات الثورية "اليسارية" من شعارات أما بغطاء "شرعي" ويزيد يركب على كل نظرية مؤامرة بعد ما يغطسها في الهوية الإسلامية ويزيد في الأخر يفوح ببعض التقنيات السينمائية كيف يبدا يحكيلك على الفرقة الناجية تقول يحكي على ال-Dernier Samourai ولو إنه خموس ما يشبهش برشة لتوم كروز ...

سي خميس الماجري يكره أمريكا وقال أنه باش يكره الصين يمكن نهار أخر . ويكره بريطانيا وانا متأكد كان في يوم من الأيام  بعيد الشر تونس تولي دولة عظمى تي بالحرام لما يكرهها..من الأخر : "هو كخميس الماجري ضد".

سي خميس كذلك ميدالية أوليمبية في الجمباز الفكري كيف يحكي على القرأن والسنة ويقول يلزم نخدموا بهم يخيل لك وإنت تسمع فيه أنه ثمة قراءة فقط ومذهب بارك و هو نفسه في بالي ينسى ال-72 فرقة إلي حكى عليهم 

خميس كذلك حقوقي فذ صحيح مش كيف المرزوقي أما حسب ما فهمت يكرز من حكم الإعدام فهذا معادي لحقوق الإنسان السلفي إلي هو الوحيد المخول باش يطبق الإعدام  

بحيث بركاتك يا ثورة البص فش رصاتلنا نعانيو 

وكل نهار جمعة واحنا فرحانين 

وحجة ميمونة لنواب النهضة إلي باش يجي نهار و يطلعوا مش مسلمين.

الدينو-كراسي

يلي تعرف قلي علاش ؟

علاش يلزمنا ديما نختارو بين فتح وحماس بين الرشوة و الفساد وأهل التكفير و الجهاد بين الشاه وأحمدي نجاد  ، ياخي مكتوب علينا نختارو بين الجنرالات والفيس "FIS" بين الصلاة والتكربيص بين الكشط والتلحيس بين الدكتاتورية والخلافة الاسلامية .

النوع الأول جربناه في بالي ولا إذا كان نحبو الدقة تجرب علينا و ما نتصورش انو يستهوى برشة ناس! بالنسبة للنوع الثاني إلي حسب رايي ضراب لغة من البريمة و يحب يجرب علينا حاجة تشبه أما مع إحترام مبادئ ديننا الحنيف معناها حويجة كيف كيف أما حلال فهمتلا .

  

إلي يقلقني في هالنوع الثاني أولاً هو إستعمالو للبكاء المفرط إلي ما يعجبنيش خاطر كثرة البكاء ما نراهاش حجة مقنعة في الخطاب السياسي .في أحسن حال إلي يبكي ينجم يكون حالو يسخف لا أكثر و لا أقل أما مهوش بشرطه هو إلي عندو الحق و النوع هذا الحق بكاي صحيح و بكاه ثلاثة أنواع 

البكاء الأول على المعاناة السابقة وهي حاجة ما عندوش فيها الحصرية حسب رايي ومهوش لازم ندخلو في التفاصيل 

البكاء الثاني على قوى الشر حاشى المحل إلي تكمبصلو ليل و نهار بش تحطملوا مستقبلو  على خاطر ما تحبوش و تكره البرنامج الدلول إلي ما عندوش وخاصةً تخدم أجندة ضد مرجعيته.

البكاء الثالث على الناس من ولاد بلادهم إلي تعدات عليهم المؤامرة إلي هوما يحبوهم برشة أما غير طايشين ما يعرفوش و هما مهمش فاهمين شبيهم ضدهم ديمة. 

تو بالنسبة للحاجة إلي تزيد تخليني نفقد الثقة في النوع هذا من الأحزاب هي التاريخ وكيف ما قال جمهور الترجي (جامي ننسى الحقيقة المرة.. )  

تو تبارك الله 100 سنة واش ملي بدات الأحزاب هذي تكور ولغة ما جاتناش الفرصة بش نوريو اش إنجموا نعملوا ماتوكلش!! أنا الحق إلي نتذكرهم بين النميري في السودان الفيس في الجزائر الإمام الخميني في إيران و السعودية بأل سعود ،لا نرى فيهم واحد يفرهد القلب و لا فيهم واحد رتح الناس من خلقتو باستحباب وهذوما أمثلة ضرت الإسلام أكثر ببرشة  من إلي ضرت الأحزاب و السياسة الحولة إلي دقدقو بها بلادهم.

 يقول القايل لا بالكشي إسلامهم ينجم يصلح دولة في حال يبداو "متدينين كيف ما يلزم" إي أما إذا كانهم متدينين برك هوما مؤهلين بش يصلحو نظام تعليمي متع كتاب لا أكثر. أنا نرى إلي الدولة تصلحها سياسة مش دين! والإقتصاد يلزموا قوانين وبرامج واضحة مهوش محصور في منع الربا مثلاً ولا في و التعليم حبتلو تحديث و شانتي أزرق مش أكثر سوايع تربية إسلامية ولا مدنية .....

 والبطالة يلزمهم برامج مش هوية! البطال ما يفقدش الذاكرة كيف تطول بطالته البطال يلوج على خدمة مش على هوية و أنا بحكم مرحلة البطالة اللاباس بها إلي تعدات علي نأكد إلي الحاجة الوحيدة إلي ما نجمتش ننساها في الوقت هذاك هي أني تونسي و دايور كان جيت سويدي راني ما قعدتش بطال الوقت هذاك الكل ههه

الحاجة الثالثة وإلي هي  تذكرني في السردوك إلي يتسردك وساقيه في الطبعة و هي نخبة الحزب إلي تتكلم على حداثة وديمقراطية و حريات وحقوق إنسان وقاعدة خطابها أبعد ما يكون على الأربعة هاذم أما يذكرك أكثر بجماعة التكفير والهجرة وحزب التحرير و حركات ما فماش شكون شوه الإسلام قدها هذيا إلي نرى فيه و بطبيعة الحال يبقى تقييم شخصي .  

هذيا بلا غير ماننسى إزدواجية الخطاب متع بعض الكوادر وحتى إزدواجية أفعالهم إلي سمعتوا مثلاً وريتو انو الكلهم ضد تسييس المنابر، وبعد يخرجلنا الدكتور يقوللنا نظفنا الجوامع وخلينا التجمعين الباهيين عاد صاحبي الغول علاش وجايع الراس وثورة وكرطوش وديقاج والواحد يبات كرشو تجري خايف لا من غدوة يقولولو لا راهي الثورة تلفولك عليها ،ولا ركبوا فوقها و قطعوا ؟،إذا كان بش تجينا سيادتك ربي يخليك تفرض علينا أئمتك علاش شكون كيفاش حسب أنا مقياس برى يفضلك برى يرحم والديك! ياخي نجيك أنا للدار نبدلك الشان إلي تتفرج فيها حتى كان هي من نوع تونس 7 ونقلك لا هذه شان ماهيش باهية أما أهوكا خليتلك الجزيرة باهية.

يا خويا في دارك جيبو يصلي بيك هالإمام الليكس !

في إنتظار برنامج وفي إنتظار انو الناس تنتخبكم خطاونا لا تبدلونا أئمة و لا تحلولنا بيران و لا تفسرولنا إسلامكم أما قولولنا اش بش تعملوا في السياسة !